Ururka waddaniga Soomaaliyeed waxaa laga dhawaaqay, 15kii May sannadka 2008, waxaana lagu beegay Maalintii SYL la aasaasay, maalintaasoo ah maalmaha Taariikhda leh ku jirta. Ururka magaciisa la yiraahdo "Ururka Waddaniga Soomaaliyeed".

Ururkan waxaa ku midaysan waddaniyiin Soomaaliiyeed oo ku kala nool Soomaaliya gudaheeda iyo adduunka Daafihiisa, Waddaniyiinta ururkan ku midoobay isuguma imaan qabiil iyo dano gaar ahaaneed. Waxay isugu yimaadeen Allah dartiis iyo dhiig waddaninimo. Sababta dhalisay in ururkan la sameeyo waxay ahayd kaddib markay waddaniyiin Soomaaliyeed fiirsan waayeen marxaladda shacbiga Soomaaliyeed ay maanta ku jiraan, taasoo ummadda ay ku dabadheeraatay colaad joogto ah, abaaro, cudurro, nolol xumo iyo rajo fiican oo aan u soo muuqan oo looga bixi karo dhibkaas.

Ururkan ma’ahan urur hubaysan mana ahan urur leh maleeshiyo u dagaalanta, waa urur bulshadeed (civil Society), urur Samofal ah (Humanitarian Organization), urur wacyigelin iyo baraarujin ah (Advising and consultation), waa urur qayb weyn ka qaadanaya Sixitaanka Siyaasadaha Soomaaliya ka khaldan (Political adjustment). Waa urur ka wada dhexeeya qof kastoo Soomaaliyeed oo uu ku jiro Dhiig Waddaninimo, Waxayna waddaniyiintaasi u siman yihiin dhulkooda hooyo, waana urur u halgamaaya sinnaan, caddaalad iyo nabad ka dhex dhalata bahweynta Soomaaliyeed.

Ururkan wuxuu u halgamayaa inuu abuuro Soomaali dhab ah oo dalkiisa iyo dadkiisa daacad u noqda, waana urur aan ka shidaal qaadanayn qabiil iyo dano waddamo shisheeye.
Hal ku dhigga Ururka 17 Sanadood Jug Jug Meesheeda Joog Waddanigii Dhiig lahow Kaca Taariikhda Soomaaliya waxaa soo maray hal ku dhigyo caan baxay kuwaasoo ka dhashay qiiro gobanimaddoon iyo qiiro waddanimo. Hal ku dhigyadaan kuma imaan koox dano gaar ah isugu timid iyo qabiil isasa soo abaabulay, waxay ku yimaadeen kacdoon shacab iyo qiiro waddanimo. Waxaana ka mid ah:

1- "Hasha Maandeeq": Xilligii ay baxday hasha maadeeq waa xilli ay jirtay qiiro waddaninimo oo ay Soomaalida dooranaysay Callan u gaar ah. Calanka waxaa loogu wanqalay Naaneys ah "Hashii Maandeeq", Naaneystaan waxaa lagu Saleeyey Xoolaha ay Soomaalida Hiddo iyo Dhaqan u leedahay. Sida "Hasha geela" Soomaaliyoo dhan waa isku raacday wax khilaaf ahna kama dhicin.
Astaanta Calankana waxaa lagu Saleeyey Midab Buluug ah oo xiddig cad oo 5 geesa leh dhexda uga Taallo, Taasoo lagu macneeyey Cirka Buluugga ah oo Eabbe na siiyey, 5-ta Soomaaliyeed iyo Midabka Cad oo ah Astaan nabadeed.
2- "Ha Noolaato" Halku dhiggaan wuxuu ku dhashay kacdoon shacbi oo ay ka buuxday qiiro gobanimodoon ah. Waana kacdoonkii Soomaali u horseeday Gobanimadii lagu diirsaday. Halku dhiggaas "Ha Noolaato", waxaa lagu daba qabtay erayga ah "Soomaaliya". Markaas waxaa soo baxay hal ku dhig caan baxay oo ah "Soomaaliya Ha Noolaato".
3- "Soomaaliyey Toosoo" Halku dhiggaan waxay asal ahaan ka soo maaxatay hees qiiro wadaninimo ay ka buuxday, markii dambana waxaa la isku raacay in laga dhigo Astaanta Qaranka ama heesta Calanka (National Anthem). Wax is qabsina ilaa hadda kama taagna, meel kastoo Soomaali isu timaaddo waxay la sara kacaan iskuna baraarujiyaan Heesta Calanka Maadeeq oo ah "Soomaaliyey toosoo, toosoo isku tiirsanaada"
Haddaba Ururka waddaniga Soomaaliyeed wuxuu idiin soo bandhigayaa hal ku dhig u baahan Kacdoon Shacbi iyo Dhiig Waddaninimo. Kaas oo ah Waddanigii Dhiig Lahow Kaca".

"Waddanigii dhiig Lahow kaca" Macnaheedu ma ahan hubka qaata oo islaaya, ama dagaalama. Waa isbeddel ha lala yimaado, qiiro waddanimo ha la is geliyo. Fadhiga ha laga kaco. Ha la is daba qabto, dhiig ha la isku yeelo, ha la isku naxo, ha la is cafiyo, intii qiiro waddaninimo ay ku dambeyso ha is abaabusho. Kitaabka Allah iyo Sunnada Nabi Maxammed (S.C.W.). ha lagu dheganaado. Ururka Waddaniga Soomaaliyeed wuxuu Horseed ka noqonayaa abaabulka qiiro waddaninimo iyo Halbeegga ah "Waddanigii dhiig lahow kaca"

Dhaqanka iyo Diinta
Shacbiga Soomaaliyeed waxay lahaayeen dhaqan u gaar ah kuna salaysan shareecada Islaamka, dhaqankooduna wuxuu lahaa xeerar aasaas u ah oo ay ku kala garbixi jireen, kaasoo markasta sal looga dhigi jiray Diinta Islaamka,wuxuuna shacbiga lahaa Culumo xagga diinta wax ku baraarujin jirtay, dadkana u kala caddeyn jiray xaqa iyo Baadilka,Soomaalida waxay dhaqan u lahayd inay ixtiraamaan culumada diinta waanadoodana qaataan.

                                                                                  » Continue to next page